راجعين بشوقنا للدفا
شايلين أحلام بعرض الكون
جوّه القلوب متستّفة
و دموع ألم جوه العيون
على كل شكل و كل لون
بين الجفون متكتّفة
و العمر فارد قصته على سكته
خايف لو الناس نسيته
راح يعمل ايه ... و يروح لمين !!
و من تاني أكيد راجعين ..
وِ في رجعونا
هتطلع شمس أشواقنا
تبدد ظلمة التايهين
و شوق يفرد هوا شراعنا
و مين يقدر يفرق . . مين
و ما تخافي . . . يا همسة قلبنا الدافي
د مهما الفجر كان غافي
هيصحي يفوق في نن العين
و يرسم أحلي حدوتة
و فاكرة النخلة و التوتة
وورد الفل و الياسمين
صحيح . . عن عيني ليه غايبين . .!!
ببص بعيني شمال ويمين
ردي عليا . . . ألاقيهم فين !!
وفين يا حدوتة الصورة؟
صورتنا و ِحنا صغيرين
بعد أمّا كنا رسمناها
مش عارفة ليه مش لاقياها
وتحت عش العصفورة
ليالي سْهِرْنا ويّاها
نغني . . نسمع لغناها
عيني عليها العصفورة
تِلْقيها ماتت من سنين
أو حتى سافرت بلاد بعيدة
لكن لمين ومكانها فين؟؟
شايفه اللي انا شايفاه..؟
يا همسة قولي لاااا
ليه الورق علي أرضنا محروق
و مدنة الجامع . . دي كانت فوق
مكسورة ليه يا همسة . . فين الناس
نايمين و مش شايفين . . لفوق الراس
نادي عليهم بس علّي الصوت . .
يا جيران قريبه و عيال صحاب
فينكم ياناس
مش شايفه غير لون السراب
ولا سامعه غير صوت الأنين
الورد حاضن كوم تراب
و الحسرة قفلت كل باب
و الدمع سارح ع المطارح
ولاعارفه رايح . . . و لاجاي منين ..
طب رحتوا فين؟
والرد ليه ميجيش
وبيبانّا فاردة جناحها . . من غير ريش
والريح ياخُدها ليه في دوامته
ردوا علينا ولا خلاص نمتوا !..
فرّحوا الحلم اللي عمره مكان حزين
ردوا على القلب اللي عاش
طول عمره يحلم بالحنين
تصرخ ...شرايين السنين
الفرح عدّى من هنا
والمُرّ ليه مكتوب لِنا
ردت قلوبنا تقوللنا
وجينا ليه
وجينا ليه
بعنينا حاضنين اللقا
ولقانا تاهت خطوته
خفنا عليه
لا الرمش يجرح سكته
قام اتنفض
وما جانا حتى فـ يوم ... رفض
يرجع ينورحلمنا
علي أرضنا
وجينا ليه تاني هنا
و الغربه ساكنه في قلبنا
موضوع: _-_حدوته مصريه_-_ 
الجمعة مايو 18, 2007 9:12 pm
